Eintrag vom 1447-02-15Informationen zum Dokument

Alex Gerhart hat versaczt sein haws, gelegen in der Wiltberherstrass zenagst hern Casparn Slikchen haws. Dem erbern Wilhalm Merttinger, burger zu Wienn, umb hundert phunt phennig, die sein leibgeding sind ,und nach seim abgang sullen si erben auf frawn Annen Perchtolts des Schuczperger tochter seiner vodern hausfrawn seligen nagst erben, darauf si zu recht gevallen sullen und alle die weil der vorgenant Alex und sein erben die obgenanten hundert phunt phenning innhabnt so sullent sy dem vorgenant Merttinger sein lebtteg jerlich davon raihen und dienn x tl. d. zu den drein tégen im jar Jeori Michaelis und Weichnachten zu yedem tag iii tl. lxxx d. Und wenn der benant Merttinger mit tod abget, so sullen denn der vorgenant Alex und sein erben die obgenant hundert phunt phening beczaln der vorgenanten Annen der Schúczpergerinn negsten erben, den sy rechtlich zugepurnt nach des Merttinger abgang inner dem nagsten moneid anverziehen. Wenn auch sie dem Merttinger die obgenant x tl. d. nicht lenger dienn und die abledigen wellen, das mugen sy tún wenn sy verlust mit hundert phunt phenningen und den negsten dinst damit der davon ze dienn gepurt. Also das sy denselben dinst dem egenanten Merttinger raihen und die hundert phunt haubtguts wider zu der stat gruntpúch mit des Merttinger wissen niderlegen sullen, daentgegen sol in dann der geltbrief daruber lautund auch von in widerumb ledig gesagt und geantburt werden angever, ut littera sonat. Actum an Mitichen vor sand Juliana tag, anno etc. xlviio.

Nota die egenant hundert phunt phening hat Dietreich Kerner selbs ausgericht und beczalt Erharten Ortl fleischaker ze Medling an stat seiner pruder und Hannsen Mullner zu Medling nach laut ainer quittungen die er darumb hat mitsambt dem saczbrief. Actum an sand Johanns abent zu sunbenden anno etc. lvito.