Eintrag vom 1455-03-17Informationen zum Dokument

Andre Köchlinger der zeinstrikcher hat versaczt sein haws, gelegen am alten Kolmarkcht zwischen Jorgen Hülger des sneider und Jacobs Kaschawer des maler hew`sern, dem erbern Jorgen Pruntaler, dieczeit kirchmaister Sand Michls kirchen zu Wien und seinen nachkómen. Umb funfczig pfund pfenig zu dem ewigen jartag, den sein vetter Mertt von Ybs der zeinstrikcher seliger hincz Sand Michel jérlich zu begeen geschafft hat. In solicher maynung, alledieweil er und sein erben und alledieweil er und sein erben und alle, die das vorgenant haws innhabent und besiczent, die obgenantn fünfczig pfunt pfennig auf demselben haws innhabent und besiczent. Die obgnantn fünfczig pfunt pfenig auf demselben haws innhaben und nicht beczaln, so sullen si den egnantn jartag jerlichen davon ausrichten und begen mit zwelf schilling pfenig an sant Mertten tag, des nachts mit ainer gesungen vigili und des morgens mit aim gesungen selambt, mit virundczwainczig stekkerczen und mit selmessen, die desselben tags oder des nagsten tags darnach sullen gelesen werden. Und ob si aber daran sawmig erfunden wurden, so sullen sy alsofft vervallen sein aim yeden kirchmaister zway pfund pfenig. Und wan si den jartag mit den zwelf schilling pfenigen nicht lenger begen wolten lassen, so sullen die obgnanten funfczig pfund pfenig mit ains kirchmaisters wissen erlegt werden zu dem gruntpuch, die dann an ain guts gut gelegt sullen werden. Damit der egnant jartag mit xii s. d. ewiclich begangen werde, als vorgeschriben stet, ut littera. Actum an Montag post letare, anno etc. lvto.

Summa iii s. x d.

Nota die egenanten l tl. d. sein widerumb abgelöst und hinwider auf das obgenant haws, so Jacob Prenner zeinstrikher gekaufft, genomen und geschriben worden, ut libro E.