Andre Krenbinczer, goltsmid, hat versaczt sein haus, gelegen am alten Kolmarkt, zunagst Hannsen Mewsleins haus ain aim tail und an dem andern zenagst Ulreichs Ganser des sneider haus. Davon man jerlich dint herren Niclasen Kiliber, caplan der mess, die Ulreich Fleikch auf unser Fraun altar, in Sand Johanns kappelln vor Werdertor gelegen, gestifft hat, vi t d. zu purkrecht, die abczulesen sind mit xx t. phennigen nach laut ains purkrechtbriefs und nicht mer. Den erbern Niclasen Lobhofer, dieczeit des rats und spitalmaister und Hannsen Schreiner hinder Sand Pangreczen an stat und zu handen Kathrein, Barbaren, Elspeten und Pangreczen, Andres Meichsner goltsmids seligen kindern, die noch nicht vogtper sind, der gerhaben sy sein, und dieselben kinder erben und irn erben. Umb zwayhundert zway phunt, sechs schilling und zehen phennig Wienner Munss, die in zu irn tail zugepurnt von des egenanten hauss wegen, da sy verkaufft habent, und sind zu beczalen, wann die egenanten kinder vogtper werden oder ir ains vogtper wirt, seinen tail an alles vercziehen. Actum an Freytag vor Invocavit, anno etc. lximo.

Summa xiii s, xiiii d.

Nota die obgenante Kathrei und Barbara sind beczalt in yede irs benanten tails, in den iic ii t, vi s und x d, bringt yeder l t, v s, xvii1/2 d, ut quittung.