Eintrag vom 1461-11-09Informationen zum Dokument

Agnes, Jörgen des Gredinger seligen witib hat versaczt ir haws, bey dem Rotenturn, zenagst am egk gegen unsers gnedigsten herren des Romischen kaisters kasten uber gelegen, daz ir der vorgenant ir man seliger geschafft. Dem erbern Niclasen Holnbrunner zu Seveld, Erntraut seiner tochtter, die er bey frau Barbara, Mertten Hilffreichs zu Karnneunburg tochter, seiner hausfrawn seligen gehabt hat und noch nicht vogtper ist, und irn erben umb ccc t d. landdeswerung, die in von dem egenanten haws zugepurn und die der egenant Niclas Holnbrunner sein lebtag sol innhaben, nuczen und niessen unverkumert. Und nach seinem tod sullen dann dieselben ccc t d lediclich erben und gevallen auf die egenante Gertrauten seine tochter. Wer aber, daz sy mit dem tod abging ee dann der benant ir vatter, dennoch sol er dieselben ccc t. d. sein lebtag unverkumert innhaben, nutzen und niessen hrn als leibgedings recht ist. Und nach seinem abgang sullen dann dieselben ccc t d erben und gevallen halbs auf der obgenanten frawn Barbaren, seiner hausfrawn nagst erben und halb auf seyn nagst erben, darauf sy dann zu recht hinerben und gevallen sullen. Und sullen die obgenant fraw Agnes und ir erben dieselben ccc t d dem ergenanten Holnbrunner, seiner tochter und irn erben ausrichten und beczalen in der stat hie zu Wienn, wenn sy dasselb gelt an sy ervodern und nicht lenger empern oder peiten wellen, darnach ynner dem nagsten halben jar. Aber alledieweil sy das gelt innhaben, so sullem sy ir jerlich davon raichen und geben xxiiii t d landeswerung zu den zwain tegen im jar, halb zu sand Johanns tag zu Sunnwenden und halb zu Weinachten nagst nacheinander kunftigen. Und sullen mit dem ersten dinst anheben ¹ zu den nagstkuftigen Weinachten an allen abslag irs haubtguts. Und ob der obenant Jörg Gredinger dem egenanten Holnbrunner, seiner tochtter und irn erben iecht versessner dinst schuldig wer, darumb sol die egenant fraw Agnes und ir erben in ein genugen tun, in aller mass, als es der egenant Gredinger noch in leben wer. Und wann die vorgenant fraw Agnes und ir erben in die benanten ccc tl. d. weczalen wellent, so sullen sy in das ain halbs jar vorhin zu wissen tun, daz sy sich darnach wissen zerichzen ungeverlich, ut littera sonat, den der vorgenant Jorg Gredinger ir man seliger darumb gegeben hat. Actum an Montag vor sand Mertten tag, anno etc. lxi.

Summa lxxii d.