Barbara, Jacoben Pignot des vilczhueter seligen wittib hat versaczt ir pranntstat, darauf nu ain hewsl gepawt ist, gelegen im Harhof zenagst des Stockharner hawss. Margreten und Wolfgangen, des benanten Pignot und Barbara, seiner egemelten hausfraun kindern, umb zwainczigk pfunt pfennig Wienner münss, die in der benant Jacob ir vater seliger auf dem benanten haws geschaft hat. Und sind zu beczalen, wann die benanten zway kinder vogtper werden. Wér aber, daz dieselben zway kinder ungevogt abgiengen ee dann die bemelt Barbara ir mútter, so súllen dann dieselben zwainczigk pfunt pfennig gevallen auf die benanten ir mútter Barbara ledigklich nach lautt des benanten Pignot geschéft, das im statpúch geschrieben stet. Actum an Montag nach unnserer lieben Frawen Purificationis, anno etc. lxiiio.

Summa xl d.