Eintrag vom 1447-03-15Informationen zum Dokument

Chunrat Strobl hat gemacht Dorothen seiner hausfraun drewhundert pfund phenig auf seim haus gelegen in der Kernerstrass zenagstn des abts haus von Sant Mareinzell an aim tail und auf seim höflein gelegen in der Weihenpurk zenagst Ekkharts goltsmids haus an aim tail und an dem andern zenagst Jacoben Gotzman haus genant in der Almarein. In solher Maynung ist, das der vorgenant Strobl mit dem tod abget ee dann die vorgenannt Dorothe sein hausfrau, so sol sy dann die vorgenantn drewhundert pfunt phenig auf dem egenanten haus und hoflein ledicklich und freilich haben und allen irn frumen damit schaffen machen und geben wem sy wil an alle irrung und sol und mag auch dann das vorgenant haus und hofl dafur innhaben nuczen und niessen an abslag des gelts solang untz das dasselb haus und hofl sein nagst erben oder wem er das schafft umb die egenanten drewhundert pfund phenig von ir losent. Get aber die vorgenant Dorothe mit dem tod ab ee denn der vorgenant Strobl ir man, so sind im dann die egenannten drewhundert pfund pfenig auf dem vorgenanten haus und hoflein gentzlich wider ledig allen sein frumen dann davon zu schaffen wie im das fugt an irrung. Actum an Mittichen nach oculi in der vasten, anno etc. xlviio.

Summa ii ½ tl. d.

Nota die obgenant Dorothen ist vor dem egenanten Strobl irm man mit tod abgangen dadurch im im die iiic tl. d. sind ledig worden. Actum an Mitichen vor Purificacionis, anno lxxmo.

lvii