Caspar Ringswegkl der pekch und Barbara sein hausfrau habent versaczt ir haws, gelegen pey dem Rotenturn undern Hafnern gegen Mertten des Kussenphenig haws uber, und stosst mit dem hindern tail an die padstuben daselbs. Den erbern Hannsen im Werd, richter und den gesworen virern zu Elppeltaw und irn nachkomen zu stiffung der mess, die Jorg Tollr daselbshin zu stifften geschafft hat, umb zwaihundert pfunt pfening der swarczen munss landeswerung in Ostereich. Und alledieweil der egenant Ringswegkl und sein hausfrau dieselben sum pfenig innhabent, so sullen sy den egenanten dem richter und den virern zu Elppeltaw und irn nachkomen zu stifftung der egenanten mess alle jar davon raihen und dienn zwelf pfunt pfening, zu den drein tegen im jar, zu Weichnachten, zu sant Jorgen tag und zu sant Michels tag, zu yedem tag vir pfunt pfenig. Und sullen mit dem ersten dinst anheben zu Weinachten nagstkunfftigen an alles vercziehen, ut littera sonat. Actum an Montag vor sant Michaels tag, anno etc. lviio.

Summa xiii s. x d.