Christan Panymair der pintter und Margret sein hausfrau habend versaczt ir hawss, gelegen vor Kernertor, zenagst Hainrich Wurm des pekhn hawss an ainem tail und an dem andern zenagst Hannsen Groblokh hawss, das ettwenn Kunigund, Steffan von Krud wittiben seligen gewesen ist. Bärblein und Kristein, Andreen Hawtzenperger des pintter seligen kinder, die noch nicht vogtper sind, umb sechczehen phunt Wienner phening, die von des obgenanten hawss wegen herkomend. Und den benanten kinden als nächsten Erben armen frewnten des benanten Steffan von Krud von den obgenanten Hannsen Groblokh und Cristan Ponymair als gescheftleuten der benanten frawen Kúnigunden mit willen und wissen meiner herren des burgermaister und rates hie umb gots willen gegeben sind. Und sind zu beczalen, wann die benanten kinder vogtper werden anvercziehen ungeverlich. Giengen aber dieselben zway kind ungevogt mit tod ab, so sullen die obgenanten sechczehen phunt phenig dann durrch die obgenanten geschéftleut verrer durch gots willen gegeben werden, nach lautt der obgenanten frawen Kúnigunden geschéft, das im statpúch hie geschrieben stet ungeverlich. Actum an Mitichen vor Gregory, anno etc. lxiiii.

Summa xxxii d.

Nota die obgenanten xvi tl. d. sind zum gruntpuch erlegt Ut registratum und sind auf Hannsen Groblokh haws vor Kernertor verschriben.