Eintrag vom 1462-04-06Informationen zum Dokument

Dorothee, Niclasen von Kalsching des schuester seligen wittib, Hanns Kalsching, ir sun, der noch nicht gevogt ist, und fraw Ursula, maister Hainreichs Seydennatter hausfrau, des benanten Hannsen swester, baide der egenanten frawn Dorotheen kinder, die sy mit dem egenanten Niclasen von Kalsching, irm man seligen erelichen gehabt hat. Habend versaczt ir hawss, gelegen bei der purgk, an ainem tail zenagst Paulen des Meichsner, seydennater, und an dem andern tail zenagst Hannsen Meichsner des schúster hewsen. Dem erbern Hannsen Winkhler, meiner allergnedigisten frawn der Römischen kaiserin etc. kuchenmaister und Elspeten seiner hausfrawen und irn baiden erben umb hundert Ungerisch guldein, gerecht in gold und wag. Und sind zú beczalen auf Goczleichnams tag schiristkünfftig an alles vercziehen ungeverlich. Actum an Erihtag post Iudica in der vassten, anno etc. lxiio.

Summa vi s. xx d.

Winkler habet cedulam.

Not, ob die die obgenant fraw Dorothea, Hanns Kalschinger, ir sun und fraw Ursula, sein swester, baider der egenanten Dorothen kinder das obgenant haws verkauffen wollten zwischen hie und Goczleichnams tag obgenant. So sullen sy das F dem egenanten Hannsen Winkhler und Eslpeten seiner hausfrawen nach rat frumer lewt vor meinklich ze kauffen geben an widersprechen ungeverlich.