Eintrag vom 1454-09-09Informationen zum Dokument

Erasem Frewntenhawser und Dorothe sein hausfrau habent versaczt ir haws, gelegen auf der Alsserstrass zenagst Symons Reyspekchen haws, davon man jerlich dint der stat zu Wienn xxii d. an sand Michels tag zu gruntdinst und nicht mer, irn kindern Philippen, Linharten und Elspethen, die dy vorgenant Dorothe pey irm erern mann Ulreichen Velabrunner gehabt hat. Umb xx tl. d., die denselben kindern zu irm tail von dem egenanten haws und zwain weingértlein, ains im Purkchveld und das ander im Durrnlewchfeld gelegen, von irs vaters gescheffts wegen zugeburnt und sullen auch die benanten kanleut dieselben kinder mit irm leib und gut innhaben, ziehen, verwesen, gewentten und mit allen irn notdurfften versorgen. Uncz das sy vogtper werdent, so sullen si in dasselb ir gelt beczalen an alles vercziehen. Wér aber, das sy ungevogt abingen, so sullen dieselben xx tl. d. gevallen auf die obgenant Dorothen, ir mutter, lediclichen nach lautt des egenanten Velabrunner seligen gescheffts, das im statpuch geschriben stet. Actum an Montag nach unser Frawn tag Nativitatis, anno domini etc. liiiito.

Summa xx d.

Habet cedulam.