Eintrag vom 1469-01-28Informationen zum Dokument

Elspeth, Linharts Zwiter hausfrau, die vormalen Hartunger von Cappellen den jungen seligen auch elcihen gehabt hat, versaczt ir padstuben mit irer zugehörung, gelegen in der Woltzeil zénagst Chunrats Kersperger des kramer hawss. Dem ersamen hochgelerten Hartunger von Cappellen, lerer baider rechten, unsers allergnedigsten heren des Römischen kaisers etc rat, irm lieben herren und sweher und sein erben umb vierhundert guter Ungrischer guldein, gerecht in gold und wag. In der maynung, das die berürtt Elspeth die yeczgenanten iiiic Ungarische gulden auf der benanten padstuben mit irer zugehorung ir lebteg unverkumert innhaben, nuczen und nyessen sol und mag und dem benanten Hartunge noch ander yemands nichtz schuldig, noch phlichtig sein, da man¹ ze thun noch ze geben. Und nach irm abgangkh sool und mag der offtgenant maister Hartunger, sein erben oder, wem er das schafft, macht, bevelhelt oder geit, dies vorgenant padstuben mit irer zugehorung an abslag der egenanten iiiic Ungarische gulden innhaben, nuczen und nyessen, solang uncz das ir nagst erben oder, wem sy die schafft oder geit, von in darumb lösent, nach der stat rechten hie getrewlich und ungeverlich. Actum an Sambstag nach Sannd Pauls tag Conversationis, anno domini etc. lxviiiino.

Summa i tl. d.

Meister Harttung habet cedulam.