Eintrag vom 1445-04-09Informationen zum Dokument

Friedreich Elsendorffer, burger zu Wienn, hat versaczt sein haus, in der Strauchgassen zenagst Hannsen Smelcz des seydenater haus gelegen. Den edlen hern Hannsen und Sigmunden, gebrüdern den Déchsenpekchen, und irn erbn umb lxxx tl. d. Also das er und sein erben dieselben summ phening die nagsten vír jar von datum der saczung ze raitten nacheinander schiristkunftig innhaben und niessen und die obgenanten Déchsenpekchen in demselben haus dieselben vir jar auch sein und wonen súllen und múgen zu irn notdurften ungeverlich und so dan dieselben vir jar vergangen und aus sind. So mügen der egenant Fridreich und sein erben das vorgenant ir haus umb die benant summ phening von den Déchsenpekchen herwider losen und wan sy die losung tún wellent das sullen sy in ain virtail jars varyn zewissentún so sullent sew in das dann umb die egenant summ phening widerumb zu losen geben und des abtreten desgeleichen wenn die Déchsenpeckhen oder ir erben dieselben summ phening nach ausgang der vir jar wider haben wellent das sullen sy dem Elsendorffer und seinen erben auch ain virtail jars vorhin zewissentún. So sullen sy dann ir haus umb die obgemelten summ phening nach demselben virtail jars widerumb von in losen, ut littera sonat. Actum an Freytag nach sand Ambrosien tag, anno etc. xlvto.

Summa v s. x d.