Eintrag vom 1442-11-05Informationen zum Dokument

Hanns Sorger, burger zu Wienn, hat verchaufft achczehenthalb phund phening geltes purkrechts auf seinem haus, gelegen am Harmarkcht gegen dem waghaus uber zenagst Erasm des Ponhaimer haus, davon man jerlich dint hern Jorgen dem Schrot, capplan Sand Peters cappellen dieczeit verweser des mess die weilent Eberhart Kasstner bey Peylertor in derselben cappellen zu stifften geschafft hat, zehen phund phening zu purkrecht und nicht mer. Umb hundert funfundsibenczig phund phening der ersamen geistlichen fraun swester Kathrein der Dietraminn, dieczeit priorinn des fraunclosters dacz Sand Larenczen zu Wienn, und irn nachkomen, sind zu dienn zu drein tégen und wider abczukauffen miteinander und den negsten dinst damit der denn davon zu dienen gevellt an allen chrieg, ut littera sonat. Actum an Montag vor sand Linharts tag, ano etc. xliido.

Summa xi s. xx d.

Nota das gelt hat Oswalt Reicholf, vogt des egnanten klosters ingnomen zu der benanten klosterfraun handen und der purkrechtbrief ist pey dem puch zesniten, an Freitag vor Judica in der vasten, xlvito.