Her Hanns Steger hat ausgeczaigt, gemacht und in saczesweis verschriben seiner hausfraun Magdalen, Symons des Éspan seligen tochter, cccc tl. d. auf der uberteurung seins hawss mit aller seiner zugehorung, genant Sant Margreten hof, gelegen in der Münsserstrass zenagst Petern des Strasser haws. Uber die cc tl. d., die seine kinder Hanns und Agnes die Dietraminn vor darauf habent und uber die vic tl. d. haimsteur und widerlegung, die der egnanten seiner hausfraun Magdalen nach lautt irs heiratbriefs nachmalen darauf verschriben sind. Also beschaidenlich ist, das der vorgnant her Hans der Steger mit tod abget ee dann die obgnant Magdalen sein hausfrau sy haben kinder miteinander oder nicht, so sol sy denn die obgnanten cccc tl. d. auf der uberteurung des egnanten hauss und seiner zugehorung lediclichen haben und allen irn frumen damit schaffen an alle irrung und sullen auch dann sy ir erben oder wem sy die benanten cccc tl. d. schafft macht oder geit die uberteurung des egnanten hauss dafur innhaben nuczen und niessen an abslag des haubtguts solang uncz das das sein nagst erben umb dieselben cccc tl. d. von in losent. Wér aber das sy derselben sumen phening auf der uberteurung des hawss nicht lenger haben wolten und die an sein erben ervordern wurden, so sullen sy denn nach solher vordrung ynner dem nagsten moneid dieselben cccc tl. d. der egnanten seiner hausfraun und irn erben oder wem sy die schafft, macht oder geit ausrichtten und beczalen an alle widerred ungeverlichen téten sew des aber also nicht, so sullen und mugen sy dann derselben sumen phening von der uberteurung des hauss bekomen wie in das am pesten fugt als solhs saczs und der statrecht ist. Beschech aber das die vorgnant frau Magdalen mit tod abging ee dann der vorgnant ir man sy haben kinder miteinander oder nicht, so sind im dann die egnanten cccc tl. d. genczlich wider ledig, ut littera sonat. Actum an Freitag vor Geori, anno etc. xlviio.

Summa nulla propter officium