Hanns Tastler, der fleischhakcher, hat versaczt sein haus, gelegen undern Riemern zenagst Andres Tuchmacher haus, seiner hausfraun Annen Hannsen des Gundakcher zu Öczestorf tochtter, umb virczig phunt pfening, die sy im zupracht hat und umb virczig pfund phening, die er ir daentgegen zu widerlegung gelobt hat. Also das die vorgenant Anna die egnanten virczig pfunt, die sy im zupracht hat, auf dem benanten haus lediclich haben sol. Wér aber das sy mit tod abging ee denn er und das sy die benanten virczig phund phening unverschafft unvermacht und unvergeben hinder ir liesse, so sullen dieselben phening erben und gevallen auf ir nagst erben darauf sy zurecht erben und gevallen sullen, die dann das vorgnant haus dafur innhaben nuczen und niessen sullen, solang uncz das es sein nagst erben darumb losent. Desgleichs sol der egnant Tastler mit den egnanten virczig pfunt widerlegung auch seinen frumen schaffen. Wér aber das er mit tod abging ee dann die egnant sein hausfrau und das er die bnanten virczig phunt widerlegung unverschafft unvermacht und unvergeben hinder sein liesse, so sullen die dann erben auf sein nagst erben. Doch hat er im gewalt vorbehalden das benant haus wider zu losen von seiner hausfraun umb achczig phund phening die dann wider angelegt sullen werden in den rechten so vor geschriben stet, ut littera. Actum an Mittichen sand Lucein tag, anno etc. xlviio.

Summa v s. x d.