Hanns Kanstorffer, burger zu Wienn hat versaczt sein grossers haws mit seiner zugehörung, genant der Alt Dechanthof, gelegen in der Weihenpurk zenagst dem andern seinem haws, das des abbts von Altenburg gewesen ist. Dem erbern weisen Cristan Prenner, dieczeit spitalmaister der burgerspital vor Kernertor zu Wienn und seinen nachkomen umb drewhundert phunt phening lanndeswerung in Österreich. Für die vir mal, die dasselb spital und die armen dürfftigen lew´t daselbs auf frawn Barbaren, Hainreichs Niderhofer witiben, aneinander im Vischhof, genant der Vogellin haws, zenagst Larenczen Swancz haws gelegen, gehabt habent. Und alle dieweil der egenant Kanstorffer und sein erben die benanten ccc tl. d. innhabent und dem egenanten spital für die vír mal nicht beczallen, so sullen sy ainem yeden spitalmaister alle jar davon raichen und geben zwainczigk phunt phening lanndeswerung in Österreich, zu den vír quattembern im jar, zu yeder quattember fünf phunt phening. Und sullen mit dem ersten dinst anheben zu der quattemer zu sand Lucein tag nagstkünftigen an alles verziehen und an abslag des haubtgúts. Auch hat der vorgenant Kanstorffer im, seinen erben und nachkómen vorbehalten, das egenant haws herwider zu lösen umb die ccc tl. d., zu welher zeit sy des im jar verlusst. Doch das sy damit so vil dinsts, was des nach anczal der zeit versessen und nicht gedint wér, mit sólher ablosung raichen und beczallen, die dann wider angelegt sullen werden, damit die vír mal den armen lew´ten im spital nicht abgeen, ut littera sonat. Actum an Montag vor unsers Fraun tag der Gepurd, anno etc. lviiio.

Summa ii ½ tl. d.