Hanns Kewsch hat versaczt sein padstuben mitsambt dem schúchhewslein dabey, gelegen undern Hafnern zenagst dem stadl an ainem tail. Dem erbern Hannsen Wisentvelder von Munchen und seinen erben umb newnundsechczig phunt, vir schilling, zwelf phening und dem erbern Walthezarn Pötschner, burger zu München und seinen erben umb hundert achtundsechczig Ungrischer guldein. Also daz der egenant Wisentfelder und sein erben am ersten und darnach der egenant Potschner und sein erben sullen nu fürbaser jerlichen den hofczins, der wochenlich von der egenanten padstuben gevellt, innemen, solang uncz daz sy der egenanten irer geltschuld beczalt werden an alle irrung. Und sullen der egenant Wisentfelder und sein erben anheben den zins, inczenemen an dem nagstkunftigen Suntag an alles vercziehen ungeverlich. Actum an Mitichen vor unser Frawn tag, als sy geporn ist, anno domini etc. lviiii.

Summa iii tl. d.

Her Conrat Holczler, hubmaister habet cedulam.

Nota der padstuben stet Anna Closterlerinn nucz und gwer und die gerichtbrief sein zum puch erlegt.