Eintrag vom 1467-04-08Informationen zum Dokument

Hanns Prawn der wuntarczt mitburger zu Wienn und Agnes sein hausfraw habend versaczt ir halbs hawss gannczes gelegen in der Kernerstrass, zenagst des ersamen weisen hern Andres Schónnprukher burgermaister hawss an ainn tail, und ist der ander tail des egenant hawss mit allen den gemechen und gemain stockhen, so nach lautt der taillbrief dartzu gehórent, Bertlmey, der obgenanten frawen Agnesen sun, den sy bey irem erérn mann maister Hannsen Giessen dem wuntarczt seligen elichen gehabt hat. Umb hundert phunt Wienner phenning für seinen vaterlichen erbtail und sind zubezalen und wann er vogtper wirdet. Gieng er aber ungevogt ab, so sullen dieselben hundert phunt phenning erben und gevallen, auf den obgenanten Hannsen Prawnn sein stewfvater. Und Agnes sein hausfrawen, sein muter lediclich an irrung getrewlich und ungeverlich. Actum an Mitichen nach sand Ambrosien tag, Anno domini etc. lxviimo.

Summa vi s. xx d.

Nota von des satz wegen hat herr Hanns Prawn als gross ain schermbrief zum puch geben. Und der satz ist darauf nach gesch(efft) des rats ausgetan. Anno etc. lxxxx. [?].