Jorg von der Sweidnicz, der würffler, hat verkaufft auf seim haus xii s. d. gelts purkrechts, gelegen hinder Sant Pangreczen zenagst Philippen des Smids haus, davon man jerlich dint, zu Sant Pangreczen cappellen, ain pfunt pfening zu purkrecht und nicht mer. Umb xii tl. d., dem ersamen herren hern Casstel, pfarrer zu Weitra, caplan Sant Niclas altar in Sant Michels kirchen zu Wienn, und seinen nachkomen und sind zu dienn zu drein tégen und wider abczukauffen miteinander mit xii tl. d. und dem nagsten dinst damit, ut littera sonat. Actum an Mittichen nach sant Franciscen tag, anno etc. xlvto.

Summa xxiiii d.

Nota die egenanten xii tl. d. hat Jorg von der Sweydnicz abgelost und her Kastl hat dieselben xii tl. gelihen auf Hannsen Schreiner grifflsmids haws hinder Sand Pangreczen zenagst Ulreichs Hasler haws gelegen, ut littera sonat. Actum an Montag vor Lucie, anno etc. liiio, und ob der alt purkrechtbrief herfur kém der sol kraftlos und vernicht sein.