Eintrag vom 1473-02-17Informationen zum Dokument

Hanns Mewrl, burger zu Wienn hat versaczt die ubertewrung seins hawss gelegen am Allten Kolmarckt genannt der Fuchlin haws gegen Sand Michel uber zenagst weilend Andres Meichsner des goltsmids haws, uber die sechsthalb phunt phenning geltes purkrechts, so dem capplan der mess die Gregorn Sweller und Margreth sein hausfrau in des Inntzinger cappeln zu der Hymelporten hie gestifft haben und mit hundert und virtzig phunt phenningen abtzelosen sein. Und uber die sechs phunt und sechtzig phenning geltes purkrechtz, so dem capplan der mess die Hainreich Huetstokh auf Sand Kathrein altar zu Sand Steffan gestifft hat und mit funftzig phunt phenning abtzekauffen vor darauf verschriben sein nach lautt der purkrechtbrief darumb ausgangen. Dem erwirdien geistlichen herren hern Mathias abtt und dem convent gemain Unnser lieben Frawen gotzhaws zu den Schotten zu Wienn und irn nachkomen zu hannden desselben gotzhawss. Umb vier hundert guter Ungrischer guldein gerecht in gold und wag. Von wegen der phrunt, die sy dem egenanten Mewrl und seiner hausfrawn Annen ir baider lebtag in dem obgenanten irm goczhaws zu geben verschriben werden. Innhalt der verschreibung so sy in darumb geben sullen. Und sein zu betzallen von dem nagstkunftigen sand Merten tag uber zway ganntze jar schirist darnach voligund oder ob das egenannt haws zwischen derselben zeit verkaufft wurde darnach an alles vertziehen und an allen irn schaden ungeverlich. Actum an Mitichen nach sannd Juliana tag, anno etc. lxxiiio.

Summa iii t d.

Mewrl habet cedulam ex parte abatis ad Scotos.