Eintrag vom 1446-07-06Informationen zum Dokument

Kathrey, Wiltpolts Groblokch hausfrau, die emalen Petern Helm den sneider auch elichen gehabt hat, hat versaczt ain haus das sy und weilent der benant Helm Sneider miteinander kaufft habent, gelegen in der Wolczeil zenagst der Padstuben. Dem vorgenanten Wiltpolten Groblokchen irm mann, umb xlviii tl. d., darumb das er damit vi tl. d. gelts purkrechts, so die zechmaister und Pharrmenig zu Awerstal vor darauf gehabt habent, damit abgeledigt hat. Also das er nu furbaser dieselben xlviii tl. d. von dem haus beczalt sol werden, ob junkfrau Barbara, der egenanten Kathrein und Helm des sneider tochter ungevogte abging, darnach an alles vercziehen. Beschech aber das dieselb Barbara gevogt wurd, so sol sy dann der egenanten xlviii tl.d. auf dem egenanten haus gancz ledig sein und pei ir besten und beleiben an alle irrung ungeverlich. Actum an Mitichen nach sand Ulreichs tag, [anno etc.] xlvito.

Summa iii s. vi d.

Exiussu consilii.

Habet cedulam.