Kathrey Dietreichs Starhants seligen tochter und Perchtolts jegermaister von Hessen eliche hausfrau hat versaczt und verschriben auf irm haws mitsambt dem metkeller gelegen mit aim tail in der Wiltwercherstrass und mit dem andern gegen des Wurffls haws über zenagst Conrats Ottinger kinder haws zwaihundert pfund pfenning die pey der stat gruntpuch gelegen und ir haimsteur sind. Irn kindern die sy mit dem egenant Hessen gewinet und lemtig hinder ir lät in solicher maynung, das sy ir lebtég die benant cc tl. d. auf dem egnant irm haws in haimsteur weis unverchumert innhaben, nuczen und niessen sol als haimsteur recht ist und nach irm tod sullen die selben cc tl. d. haimsteur erben und gevallen auf ire kinder, die sy mit dem egnant Hessen gewinnen und lembtig hinder ir lät. Liesse sy aber nicht kinder hinder ir oder ob sy kinder lesse und das die auch abgingen ee sy vogtper wurden, so sullen dann dieselben cc tl. d. haimsteur erben und gevallen auf ir nagst erben, darauf sy zurecht erben sollen. Beschech aber das der egenant Hess mit tod abging ee denn sy, und das er ir nicht kinder liess oder ob sy kider miteinander hieten und das die auch abgingen ee denn sy, so sind ir dann die egenant cc tl. d. genczlich wider ledig ut littera sonat. Actum an Montag nach Petri et Pauli Anno etc. lvto.

Summa xiii s. x d.