Eintrag vom 1461-05-22Informationen zum Dokument

Larencz Widman schuster und Agnes sein swester Hannsen Larenczer des schuster hausfraw habent versaczt ir haws gelegen in der Kernerstrass zenagst Kristans Wissinger haws. Dem erbern Jórgen und Wolfgangen irn prüdern, Steffans Widman seligen súnen und irn erben, umb lxiiii tl. W(ienner) d. die sew anerstorben sind und in erblichen fur irn tail zugepurn, von dem haws in der Kernerstrass zenagst Kristans Wissinger haws gelegen, daz weilent Steffans Widman egenant und Kathrey sein erere hausfraw seligen miteinander gekaufft habent gehabt, und denselben zwain knaben gesprochen sind worden. Und sind zubeczalen, wenn die egenanten Jorg und Wolfgang vogtper werden, darnach an alles vercziehen und dieweil sy ungevogt sein, so sullen dy egenanten Larenncz Widman und Agnes sein swester dieselben zway kinder ir pruder mit irm leib und gut innhaben ziehen und <und> verwesen und mit kost und gewant versorgen, als solhen kindern zugehort an abslag irs guts nucz, daz sy vogtper werdent treulich und ungeverlich. Actum an Freitag vor dem Phingstag, anno etc. lxio.

Summa ½ tl. viii d.

Nota aus des obgenant sacz sind dem egenant Wolfgang auf dem egenant hawss verschriben worden xlii tl. x s. x d. und <und> erblich an in komen.

Nota umb das egenant haws stet die obgenant Agnes nucz und gwer geschrieben und hat dies(elben) xlii tl. v s. x d. die irs pruder Wolfgangen zugepuren auf demselben hawss vergútt.