Eintrag vom 1453-03-12Informationen zum Dokument

Her Mathes und her Niclas gepruder die Slikchen herren zu der Weissenkirchen habent anstat und als gerhaben hern Wenczlaben hern Sigismunds Frum, Constancia und Beatrixen geswistreiden, hern Casparn des Slikchen irs pruder seligen kinder, die si mit irn leiben und gút innhaben, versaczt derselben kinder haws mit seiner zugehorung, das irs vaters seligen gewesen ist, gelegen in der Wiltwerherstrass zwischen Dietreichs Keser und des Peilhakchen hewsern. Dem ersamen hochgelerten maister Harttung von Kappelln lerer bebstlicher und kaiserlicher rechten und seinen erben umb virhundert guter Ungrischer guldein gerecht in gold und wag. Und sind zubeczaln auf sant Johanns tag zu Sunwenden im virundfúnfczigisten jar nagstkunfftigen, an widerred und an alles vercziehen ungeverlich ut littera sonat. Actum an sand Gregorn tag, anno domini etc. liiio.

Summa iii tl. xxx d.

Hic nota.

Ex iussu consilii.

Nota das die vorgenant her Mathes und her Niclas gepruder die Slikchen habent sich gegen dem burgermaister und rat anstat irselbs und hern Casparn irs pruders seligen kinder verschriben und verpunden, das sy sew, von der saczung und vertigung des egemelten saczbriefs an allen irn schaden ledigen und losen sullen. Und sol in auch unvergriffen sein an der verschreibung, so sy emaln von hern Casparen haben, nach lautt ains besundern versorgbriefs, die paid peyeinander in ainer statk im Rotturn, darczu der kamrer die slussn hat, ligent.