Margreth Giligen Winkchler des vilczhuter seligen witib, hat versaczt ir halbs haws mit allen den gemechen und gemainen stükchen, so nach lautt der tailbrief darczu gehorent ganczes gelegen im Schúlhof anders genant am Judenplacz zenagst Steffans Sorgenfrey haus an ainen tail und mit den andern zenagst Hainreichs von Essling haws. Den erbern Marthen und Margreten irn kindern die sy bei dem benant Winkchler gehabt hat und irn erben vaterhalben umb hundert und dreissig phunt phenning landeswerung in Österreich, für irn vaterlichen erbtail und sind zubeczalen wenn dieselben ire kinder vogtper werden und zu iren beschaiden jaren komment, yedem seinen tail an alles vercziehen. Wer aber das ir ains ungevogts abging, so sol desselben tail der geltschuld erben auf das ander sein geswistreidt das in leben pleibt. Ging dasselb dann auch ungevogts ab so sol die obgenant Margret dieselben hundert und dreissigk phunt phenning ir lebteg unverkumert innhaben nuczen und niessen und nach irm tod sullen sy erben und gevallen auf des egenant Giligen Winkchler irs manns seligen nagst erben an alle hindernúss ut littera sonat. Actum an Mittichen vor sand Mertten tag, anno etc. lviiio.

Summa i tl. xx d.

Michel Amman und sein miterben habent cedulam.

Nota der benant saczbrief ist von der egenant Margreten in den rat gelegt worden zu irer kinder und irere erben hannden, der brief ist vernicht.