Larenncz Taschendorffer appotegkér hat versaczt die úbertewrung seins hawss gelegen am Graben zenagst weilent Stephanns Awer seligen hawss, úber die zwayhundert phunt phenning purkrechts, darumb es vormalen dem capplan der mess, so weilent fraw Anna die Sindramin auf Aller Heiligen altar hincz Sand Stephan hie gestifft hat, versaczt ist. Der erbern Margrethen, Paulen von Tulln hausfrawen und irn erben, umb fúnffundfúnffzigkh phunt Wienner phenning, die herkomen von den sechtzigkh phunt phenning, die ir vormalen Elspeth Jorgen Wedler hausfrawen auf dem egenant hawss auch verschriben gehabt hat, nach lautt der gruntzedeln, die darumb vorhannden und noch in ir gwaltsam ist. Und sind die zubezalen, wann sy die ervordernt, und nicht lennger peiten wellen darnach an alles verziehen getrewlich und ungeverlich. Actum an Montag vor sand Peter und sand Pauls tag appostolorum, anno domini etc. lxviiimo.

Summa iii s. xx d.