Mathes Miltenberger hat verkaufft drew phunt phenning gelts purkrechts auf seinn hawss gelegen im Schulhof im Winkhl zenagst Ulreichs Stedlmair haws an ainen tail und an dem andern zenagst Hannsen Liechtenperger hawss umb vierundzwaintzigkh phunt phenning, die vormalen auf Stephanns Zachmann hawss am Newnmarkht gelegen gewesen sein, die man damit darob gelösst hat. Dem ersamen priester herrn Sigmunden Stettner öbristen capplan Sand Jorgen cappellen im Túmbbtosthof zu Wienn und seinen nachkomen capplén derselben cappellen. Und sind zu dienn zu drein tégen im jare und widerumb abzekauffen miteinander mit xxiiii phunt phenning und dem nagsten dinst damit ut littera sonat. Actum an Mitichen vor Reminiscere, anno etc. lxximo.

Summa xlviii d.

Nota daz gelt ist widerumb ausgelihen unnd auf Petern Holczapphl haws in der Pognerstrass verschriben.