Eintrag vom 1441-10-06Informationen zum Dokument

Niclas Ponhalm und Helen, sein hausfraw, habent versaczt ir haws, gelegen in der Kernerstrass zenagst des abts haws von Sant Marein Zell. Dem erbern Jacoben Smal, Annen, seiner hausfrawn, und ir paider erben, umb drewhundert phunt pfening zu beczaln hieczwischen und sant Michels tag, der in dem virzehenhundertisten und vir und virczigisten jar schirist kómen wirdet, in solher beschaiden, daz derselb Smal, sein hausfrau oder ir erben dasselb haws dieselb vrist innhaben, núczen und niessen sullen und múgen, an abslag der vorgenanten geltschuld. Doch daz der egenant Ponhalm, Helen, sein hausfraw, oder ir paider erben dasselb haws ynner derselben vrist auch verkauffen múgen zu yeder zeit, und daz vertigen nach entrichtung und beczalung der vorgemelten schuld, wem si wellen, und daz dennoch derselb Smal, sein hausfraw oder ir paider erben darinn bleiben uncz auf sant Michels tag der nach solher beczalung und verkauffung néchstvolget, und lenger nicht, sunder des dann genczlich sullen abtreten zu demselben sant Michel tag in aller mass als in das gelassen und versaczt ist ungeverlich. Actum an Freytag nach sant Franciscen tag, anno etc. xlio.

Summa ii ½ tl. d.

Paulin habet cedulam.

Strobl habet cedulam.

Nota die genant ccc tl. d. hat Kunter Strobl der das haus gekaufft hat nider gelegt zu den gruntpuch, an Montag post Oculi, anno etc. xlviii.