Eintrag vom 1450-10-01Informationen zum Dokument

Niclas Lambacher apoteker, dieczeit der hochwirdigen schul zu Wien richter und eisenhúter in der múnss zu Wienn hat versaczt sein haus gelegen gegen Sant Stephans freithof uber am egk als man in die Goltsmidgassen get an aim tail und an dem andern zenagst Stephans Püsenperger des zinngiesser haus, davon man jerlich dint Wilhalmen Merttinger zehen phunt phenning die abzelosen sind mit hundert phunt phenning, nach lautt ains briefs und hern Petern Liebphartter dieczeit kaplan der mess, die her Jacob Lewbman auf Unser Frawn altar in Sand Jorgen kappellen im Tumbbrobsthof gelegen gestifft hat, zwai phunt phenning und hern Hannsen Lautterpach caplan der benant Sand Jorgen ... kappellen, daselbs ain phunt phenning alles zu purkrecht und nicht mer. Der erbern Barbaren Hannsen Hébrem des pekchen seligen tochter seiner hausfrawn, umb anderthalbhundert phunt phenning haimsteur und umb zwayhundert funfundzwainczig phunt phenning zu rechter morgengab nach der stat rechten, ut littera sonat. Actum an Phincztag nach sand Michels tag, anno etc. lmo.

Summa iii tl. d.

Nota die obgenanten i ½ c tl. d. haimbstewr seinn verschriben auf Hannsen Laybacher seins suns hawss gelegen innerhalb Kernnerthor zunagst Sygmunnds Gwalczhofer munnssner haws. Ut patet libro no. obligacine E.