Niclas Ponhalm und Helen sein hausfraw habent versaczt ir haws mit seiner zugehorung gelegen mit dem vodern tail undern Satlern zu Wienn, und stosset mit dem hindern tail in den Kamerhof zenagst Andres Hofmaister des kursner haus an ainem tail. Dem erbern weisen Kristan Wissinger burger zu Wienn und seinen erben, umb zwaihundert phunt und zwayunddreissig phunt phenning landeswerung, oder aber sovil gúter newér Ungrischer guldein gercht in gold und wag dafúr, als sich gepúrt albeg ainen yeden guldein fur achtthalben schilling phenning zu raitten angevérd. Und sind zubezaln auf sand Jorgen tag so man zalt nach Kristi gepurt virczehenhundert und im funfundfunfczigisten jare nagstkunftigen an widerred und an alles vercziehen ungeverlich ut littera sonat. Actum an Montag vor sand Philipps und sant Jacobs tag, anno domini etc. liiio.

Summa xv s. iiii d.