Eintrag vom 1455-12-08Informationen zum Dokument

Niclas Zebusch der Reiner und Kathrey sein hausfrau habent versaczt ir haus, gelegen undern Reinern am egk, daman in den Viechhof get hinder Sand Jacob zenagst weilent des Meúschein haws. Dem erbern hern Thoman von Michelsteten, caplan Sand Mertten altar zu Drésskirchen und seinen erben oder wem er die schafft umb sechczig pfund pfenning. Und sind zubeczalen von den nasgtkúnfftigen Weichnachten uber ain ganczes jar an alles vercziehen. Actum an Montag nach sand Niclas tag, anno domini etc. lvto.

Summa ½ tl. d.

Caplan habet cedulam.

Mert habet cedulam.

Nota des egenant hern Thomans geschefftleut habent den vorgenant sacz ubergeben Mertten von Krembs dem portenmacher und seinen erben lediclichen seinen frumen damit zuschaffen nach lautt ains ubergabbriefs, so er darumb hat. Actum an Phincztag vor Urbani anno etc. lvii.