Eintrag vom 1472-08-14Informationen zum Dokument

Hanns Kyembseer slosser und Ursula sein hausfraw habent verkaufft zway phunt phenning gelts purkrechts auf der ubertewrung irs halben hawss, des gegentail Niclas Greyff der schuester und Helen sein hausfraw innhaben, ganntzes gelegen in der Kernerstrass zenagst dem haws genant Zu der Roten túr, uber die iii ½ Hungrischen guldein gúlt, so der hachwirdigen facultet der juristen zu der Newen cappellen in írer schuel hie auch uber die zehen schilling phenning gelts purkrechts, die dem pharrer zu Sand Johanns in der Siechenals vormalen auf dem egenanten gannczen hawss verschriben sein, nach lautt der verschreibung, darumb ausgangen und uber die zehen phunt phenning, darumb dasselb haws Berchtolden von Rab an stat und als gerhaben zuhannden junkhfrawen Barbaren Michelen Wennger seligen tochter versaczt ist, umb sechtzehen phunt Wienner pehnning und emalen auf Niclasen Lambacher hawss am egkh gegen Sand Steffan úber gelegen gewesen sein. Dem erbern priester herrn Kunraten Zéngkl capplan der mess, die weilent herr Jacob Lewmann korherr Allerheiligen tumbkirchen zu Sand Steffan zu Wienn, auf Unser Frawen altar in Sand Jorgen cappellen im Tumbbrosst gelegen, gestifft hat und seinen nachkomen capplen derselben mess. Und sein zu dienn zu drein tégen und widerumb abzukauffen miteinander mit sechtzehen phunt Wienner phenning und dem nagsten dinst damit ut littera sonat. Actum an Freitag vor Unser lieben Frawen tag der Schidung, anno domini etc. lxxii.

Summa xxxii d.

Nota das obgenant haws ist von burgermaister und rate Micheln Flúgl dem schúster und Katherinen seiner hawsfrawn verkhawfft und die obgenantn drew búrgkhrecht abczethun geschafft, darfúr dann ainsundfúnfczig phunt sex schilling xii¹ phenning die uberbeczallung gemainer stat, stewr und anslég auch der fúnfczig Ungrisch guldein, so vormalln der facultet der juristen darauf verschriben gewesen uberbeliben zu dem búch erlégt worden seinn, die man dann nach gelégenhait aines yeden búrkrechtz auftailln und verrer anlégen sol. Actum an Freytag nach Exaudi im xvc und dryttn jar.