Eintrag vom 1445-08-23Informationen zum Dokument

Perchtolt von Ellerbach, hern Purkharts von Ellerbach seligen sun, hat verkaufft auf ainen rechtten widerkauff sein haus mit aller seiner zugehörung, gelegen am Graben zu Wienn zenagst dem prothaus, davon man jerlich dint den geistlichen herren zu den Predigern sechs pfund pfening, hincz den Minnornbrüdern ain pfunt pfening und dem pfarrer in der Siehenalss zwai pfunt pfening alles zu purkrecht und nicht mer. Dem erbern Wenczlaben Ratenperger, burger zu Wienn und seinen erben, umb drewhundert Ungrisch guldein in gold. Also mit ausgnomen worten, wenn der vorgnant Perchtolt von Ellerbach oder sein erben das vorgenant haus mit seiner zugehorung von dem benanten Ratenperger und seinen erben herwider kauffen und zu irn handen pringen wellen, so sullent sy in dann solhs widerkaufs an alle widerred stattúen und dasselb haus mit seiner zugehörung herwider zu kauffen geben von datum des briefs ynner den nagstkünftigen sechs jaren wenn sew des begernt jerlich an sant Michels tag oder ynner den nagsten virczehen tagen vor oder ynner den nagsten virczehen tagen hinnach ungeverlich umb die egnanten drewhundert Ungrischer guldein in gold und wenn sy derselben sumen guldein in der yeczgemelten zeit von dem egnanten von Ellerbach oder seinen erben also gancz entrichtt sein so sullen sy in dann daengegen des egnanten irs hauss mit seiner zugehorung wider abtretten und den widerkaufbrief damit inantwurtten und ubergeben zu iren handen auch an alle widerred und ausczüg treulich und ungeverlich. Beschéch aber das der egenant von Ellerbach und sein erben solichen widerkauff von dem egnanten Ratenperger und seinen erben ynner der vorgmelten frist und zeit und in der maynung als vorgeschriben stet nicht téten, so sullen dann sy dem egnanten von Ellerbach und seinen erben noch nyemant anderm von iren wegen furbaser kains widerkauffs nicht mer stattún schuldig noch gepunden sein in kainerlay weis und sol auch dann das vorgnant haus mit seiner zugehorung umb die vorgnanten drewhundert gulden ir kauffts gut sein damit sy dann furbaser lediclich und freilich allen irn frumen schaffen sullen und mugen verkauffen verseczen schaffen machen und geben wem sy wellen an irrung doch das sy dann mit der stat davon leiden sullen als ander mitburger daselbs, ut littera sonat. Actum an Montag sant Bertlmes abent, anno etc. xlvto.

Summa ii tl. xliiii d.

Nota den widerkauff hat getan der vorgenant her Berchtold von Ellerbach durch seinen diener an Samstag vor sand Mathens tag, ano etc. lo und den kauf widerkaufbrief hat in der Ratenperger wider ubergeben.