Eintrag vom 1451-11-19Informationen zum Dokument

Peter Obrecht dieczeit des rats der stat zu Wienn hat versaczt sein haws gelegen in der Kernerstrass, das weilent maister Erharts Newnkircher des glokengiesser gewesen ist ge zenagst Micheln Anthofer des zingiesser haus. Der erbern fraun Dorothen Hannsen Veder des Gudler hausfraun, die emalen den benant maister Erharten seligen auch elichen gehabt hat und desselben maister Erharts erben umb lx tl. d. die der egnant Dorothen von dem benant maister Erharten morgengab sein. Und sol ir jerlich davon diennen alledieweil er die innhat funfthalb pfunt phenning zu den zwain tégen halb zu Weichnachten und halb zu Sunbenden anvercziehen und an abgang des haubtguts. Wer aber, das die egnant Dorothe mit tod abging ee wenn er das gelt abgeledigt oder nidergelegt hat, so sol er dann die egnant lx tl. d. ausrichten, des obgnant maister Erharts seligen negsten erben, den sy rechtlichen zugeburnt, wenn si darumb ervont werden, darnach ynner der nagsten vir wochen anvercziehen. Auch hat er ganczen gewalt wan er die vorgnant funfthalb phunt der egnant Dorothen nicht mer dienn wil, so sol er dann die obgnant lx tl. d. ynner den nagsten virczehen tagen nach aim yeden dinstag an den dinst, oder ynner den nagsten virczehen tagen vor ain yeden dinstag mit demselben dinst zu der stat gruntpuch niderlegen mit irm wissen und wann er das getan hat, so sol im da vorgnant haus wider ledig sein, und der saczbrief geantwurtt werden zu irn handen, und sullen auch dan dieselben lx tl. d. der egnant Dorothen wider angelegt und verschriben werden als morgengab und der stat recht ist, damit die des egenant maister Erharts nagst erben, so das zuschulden kumbt wissen zufinden ut littera. Actum an Freitag vor sant Kathrein tag anno domini etc. lio.

Summa ½ t d.