Paul Pichler der koch und Anna sein hausfrau die emalen Clausen koch seligen auch elichen gehabt hat, habent versaczt ir haws mit seiner zugehorung gelegen am egk pey dem Refelpúhl in der Pognergassen zenagst Jacobs Pignot des Vilczhuter haus an aim tail und an dem andern, zenagst Hainrichs Gruber des messrer haus. Dem erbern Steffan Hopher dem kramer anstat und als gerhaben Hainrichs des egnant Klausen seligen sún, der noch nicht vogtper ist, und seinen erben umb funfundsibenczig pfund pfenning, so im zu seim tail erblichen zugepurnt von des hauss wegen im Húnergesslein, das des obgnant seins vater seligen und der egnant Annen seiner muter gesambte hand gewesen, und das dieselb Anna verchaufft hat und sind zubeczalen wan derselb Hainrich vogtpér wirdet, oder ob er ungevogt abging darnach seinen nagsten erben vaterhalben an alles vercziehen. Actum an Mittichen vor sand Erasems tag, anno domini etc. lvito.

Summa v s. d.

Habet cedulam.

Der prior habet cedulam.

Nota der egenant Peter Haimer hat versessen hincz den Augustiner hie getan und hat den obgenanten sacz mit allen seinen krefften und artikeln dem ersamen pruder Jorgen Hintperger prior und dem convent gemain zu den Augusinerns zu Wienn lediclich ubergeben, allen iren frumen damit zeschaffen, wie sy verlusst ale mit andern guten so zu dem egenanten goczhauwss gehörnt an irrung.

Den sacz hat H. Trunschuch auf sich genomen auf den egenant hawss.