Eintrag vom 1454-08-07Informationen zum Dokument

Stephan Tengk, dieczeit des rats der stat zu Wienn, und Anna, sein hausfrau, habent hingelassen Colman Wulderstorffer, dem kürsner, Kathrein, seiner hausfraun, und allen irn erben und nachkomen die ir haus, das etwenn des alten urtailschreiber gewesen ist, innhabent und besiczent irn gemach in irm haus daneben, gelegen gegen¹ dem Vischmarkt uber. Also daz si dens gemach unden auf der erden bèy dem secret gelegen ordenlich innhaben nuczen und niessen und dem egenanten Stephan Tengken seiner hausfraun irn erben und nachkomen, die das vorgenant haus gegen dem Vischmarkt uber gelegen innhabent und besiczent, jerlichen zu hofczins davon raihen und dienn sullen zwelf schilling Wienner pfening zu den rein tegen im jar zu Weinachten, zu sand Jorgen tag und zu sand Michels tag zu yèdem tag ain halb phunt phening als hofczins recht ist. Sy sullen auch dem egenanten Tenken und seiner hausfraun das liecht und die venster so in dem gemach ob der tür und auf den obern podem des gmachs gent ungeirrt beleiben und das wasser herab in ainer rynnen durch ir haus ausfliessen lassen und was an gemaur und podem des gmachs not zu pauen ist das súllen sew ausrichten. Und wenn der egenant Kolman sein hausfrau irn erben oder nachkomen den egenanten hofczins nicht mer dienen wolten, so sullen sich der Tengk sein hausfrau irn erben oder nachkomen irs gemachs bey der erden wider underwinden und zu gwéndlicher zeit irn ingang und aufgang darczu haben an irrung und den zu irn notdurften prauhen oder verrer verlassen wie si verlusst. Doch súllen seu kain phèrt, saw noch ander viech darinn haben desgleichs. Wen der egenant Tengk sein hausfrau irn erben oder nachkomen in irm haus ain tur in den egenanten irn gemach machen und den hofczins nicht lenger innhaben wolten des süllen si auch gewalt haben und die tur die aus des Kolmans haus darein get vermaurn lassen aber das liecht und venster ob ders(elben) tür in den gemach sol dennoch ungeirrt besten und beleiben als dacz yètz stet und das wasser seinen ausgang durch desselben Kolmans haus haben als das von alter ist herkomen, ut littera sonat. Actum an Mitichen vor sand Larenczen tag, anno etc. liiiio.

Summa xxii d.