Thoman Wild, burger zu Wienn, az versaczt sein haus mit aller seiner zugehornung, gelegen in der Wiltberherstrass hie zu Wien zenagst Jacoben Rechwein haus, ausgenomen daz hewsl, daz er von dem Sukl, und dacz haus daran, daz er von Hansen Walich gekauft hat, und der zwair gewelb bei der Infart under der newen stuben, die auch an des egenanten Sukleins haus stossent, die hat er in vorbehalden und hiemit nicht versatzt. Der erbern frawn Margreten, Petern des Flotzer zu Kornnewnburg tochter, seiner hausfraun, umb sechshundert phunt Wiener pfenig zu rechter morgengab nach der statrechten hie ze Wien. Insolcher maynung daz die benantn vic tl. d. auf dem egenant haus erst nach seiner und der vorgenanten Margreten seiner hausfraun abgang erben und gevallen sullen auf ire kinder, die si yetzt miteinander haben und furbas miteinander gewynnen an allen krieg. Wer aber das er mit dem tod abging ee denn die benant sein hausfrau und daz er ir nicht kinder liezz oder ob er ir kinder liezz die sy miteinander hieten und daz die auch abgingen ee denn dieselb sein hausfrau darnach, sol si die egenanten vic tl. d.morgengab, auf dem egenanten haus ir lebteg innhaben nutzen und niessen unverchumert uncz an irn tod als morgengab recht ist und nach irn abgang sullen dieselben vic tl. d. herwider erben und gevallen auf sein nagst erben darauf sy dan zu recht erben und gevallen sullen. Beschech aber datz die benant Margret mit dem tod abging ee denn er und das si im nicht kinder liess oder ob si im kinder liezz und daz die auch abgingen ee denn er, so sind im dan die egenanten vic tl. d. wider ledig worden.

---

Auch hat im der egenant Wild und seinen erben gwalt vorbehalden, das sy das egenant haus wider von der egenanten Margreten seiner hausfraun umb vic tl. d. gelosen mügen wenn si des verlust, doch also daz dan dieselben pfenig nach irer baider frewnt rat derselben seiner hausfraun wider angelegt und verschriben sullen werden in den rechten so vor beegriffen ist ungeverlich, ut littera sonat. Actum an sand Erharts tag, anno domini etc. xliiio.

Summa v tl. minus v s.d.