Eintrag vom 1471-03-13Informationen zum Dokument

Thoman Pluemenrot und Kathrey, sein hausfraw, habent versaczt ir hawss, gelegen hinder Sand Pangretzen zenagst Hannsen Miesenperger hawss. Dem erbern Wolfgangen Orter, mitburger zu Wienn, und sein erben, umb funfftzigkh phunt Wienner phening und sind zubezalen von dem nagstkünfftigen sand Jorgen tag uber ain ganntzs jare nagstkunfftigen an alles verziehen. In soher maynung das der obgenant Orter die bemelten fünfftzigkh phunt phening sein lebtèg unverkumert innhaben nuczen und nyèssen und nach seinem abganggkh und tod sullen dieselben fünfftzigkh phunt phening erben und gevallen auf seine kinder, die er bey weilent seiner hausfrawn Affren seligen elichen gehabt hat, ledichlich. Wer aber das dieselben kinder nach im ungevogt abgiengen oder ob sy vogtper wurden und die bemelten fünfftzigkh phunt phening unverschafft unvermacht und unverkumert hinder in liessen, so sullen die erben und gevallen auf die obgenanten Wolfgangs Orter und seiner hausfrawn Affren seligen nagst erben darauf sy zu recht erben und gevalllen sullen. Und ob der yetzgenant Orter¹ die bemelten seine kinder uberlebte, so sullen die vorgenanten funfftzigkh phunt phening gleich halb im ledichlich zusteen und nach sol und mag den andern halben tail sein lebteg unverkumert innhaben und nach seinem abgangkh sol der erben und gevallen auf der obgenanten Affren seligen nagsten erben darauf sy zu recht erben und gevllen, ut littera sonat. Actum an Mitichn nach sand Gregoren tag, anno etc. lxximo.

Summa iii s. x d.