Ursula, Larenczen des Swancz burger zu Wien hausfraw, hat verkaufft virundzwaintzig pfunt pfening geltz purkrechtz auf irm haus, gelegen am Silberpühel zu Wien am egk als man an den Kienmarkht get zenagst Hern Hannsn des Würffel haus. Umb virhundert guter newer Ungrischer guldein gerecht in gold und wag, den erbern weisen dem richter und dem rat zu Hainburg und irn nachkomen und sind zu dienn zu den vir quatembern im jar zu yedem quatember sechs pfunt pfening. Es ist auch dasselb purkrecht wider abzekauffen miteinander mit virhundet Ungrischer gulden oder zeaintzign ye sechs pfunt gelts mit hundert gulden in gold und den nagst dinst damit der den davon ze dienn gevellet an allen krieg, ut littera sonat. Actum an Montag nach Reminiscere in der vasten, anno domini etc. xxxviiio.

Summa ii ½ tl. d.