Ulreich Krembser, der purstenpinter, und Kathrey, sein hausfraw, habent verchaufft ain phunt phenig geltz purkrechts auf irm haus, gelegen hinder Sand Pangreczen zenagst Hainreichs Pluemler des refler haus, davon man jerlich dient Sand Pangreczen cappellen dreissig pfening und hern Symon Tegl, caplan Sand Sigmunds und Sant Wolfgangs cappellen underm letter zu Sant Steffan zu Wienn, newn schilling phening ze purkrecht und nicht mer. Umb acht pfunt pfenig, dem erbern weisen Linharten Newnhofer, diezeit des rats und kirichmaister Sand Michels kirchen zu Wien, und seiner nachkomen und gehornt zu ausrichtigung der funfundvirtzig mess, die weilent Fridreich Haberman der schuster in der egenanten kirchen ze lesen geschafft hat, und sind zu diennen zu drein tegen und wider abzekauffen miteinander mit acht pfunt pfeningen und den nagsten dinst damit, ut littera sonat. Actum an Mitichen nach sand Lucein tag, anno etc. xxxviiio.

Summa xvi d.