Ulreich Völkchel hat versaczt die ubertewrungen seins hawss, gelegen in dem gesslein zenagst der padstuben zu den rorn an ainen tail und an dem andern zenagst Veiten Hintperger haws, uber die vir phunt phening gelts purkrechts, die her Kristan Widhakcher kaplan der mess und kaplaneistat die Hainreich Purkharczperger dacz Sand Steffan gestifft hat vor darauf hat, und uber die funf phunt phening gelcz purkrechts, die her Hanns Richtter, levitt zu Sand Steffan dieczeit verweser der mess so die Urbetschen auf sand Valteins altar zu Sand Peter daselbs gestifft habent nachmalen darauf verschriben sein, und uber die sibenczig phunt phening, die Hennslein seinem sun und seinen erben auch darauf verphent sind. Der edlen Elspeten, seiner hausfrawn Wolfgangs Seebekchen seligen tochter, die emalen Lewpolten Neidegker zu Mares seligen auch elichen gehabt hat, umb zwayhundert phunt phening haimstewr und umb zwaihundert phunt phening widerlegungen, ut littera sonat. Actum an Mitichen nach sand Erasemstag, anno domini etc. lviiiio.

Summa iii s. lxxx d.

Nota der gemechtbrief ist vernicht und zu dem gruntpuch erlegt worden von Merten, Hennssen, Tibolten Sebekhen gwaltragern, der auch zu dem puch erlegt ist.