Eintrag vom 1450-08-12Informationen zum Dokument

Andre Gundorffer hat versaczt sein haus, gelegen in der Weihenpurgk pey Sand Jeronimy, und was darczu gehöret, das ettwan zway hewser gewesen sind, zenagst Veiten Illuminatori haus an ainer seitten und mit der anderen zenagst Erhartin der Tuchbraitterin haus. Als das mit frid und gemeúr umfangen und mit ziegln gedekcht ist und mitsamt der ausgeprochen stuben, die yecz mit schintln gedekcht ist, zenagst dem prunn, und das gértl daran, uncz hinden an die plankchen des benanten hauss und ramhofs, davon man jerlich dint aim yeden brobst zu Sand Steffan zu Wienn ain halb phund phening zu purkrecht und nicht mer. Dem edln Josten Rietentaler, fraun Magdalen seiner hausfraun und irn erben umb drewhundert phund Wienner pfening der swarczen münss und sind zu beczalen von heutigem tag zu raitten uber fünf gancze jar, die négst nacheinander kóment an alles vercziehen. Sunder ist zemerkchen, alle dieweil der vorgenant Rietentaler sein hausfrau und ir erben das egenant haws in saczesweise innhabent, so sullent Andre Gundorffer und sein erben das selber verdienn, auch versteurn und alle mitleidung der stat davon ausrichten und ob sich bégèb, das sew ettwas notdürffticlichen an dem haws und seiner zugehörung pawn müsten, das sullen sy mit des Gundorffer oder seiner erben wissen tún. Doch ob dasselb haus mit seiner zugehorung in furbaser in kaufsweis nicht gevertigt möcht werden, so sullent der Gundorffer und sein erben in dann dasselbig paw oder gelt, das sy darauf also mit irm wissen gelegt hieten, auch beczalen, abvragen und widerkern nach lautt des satzbriefs. Actum an Mitichen vor unsers Fraun tag Assumptionis, anno etc. lmo.

Summa ii ½ tl. d.