Eintrag vom 1451-03-29Informationen zum Dokument

Andre Schönpruker hat versaczt der uberteurung seins hauss, in der Kernerstrass am egk zenagst der gassen, als man in die Weihenpurk get, an aim tail und an dem andern zenagst maister Hannsen Gressen haus gelegen. Über die funfhundert phund phening haimsteur und morgengab, die er seiner hausfraun Kathrein vormaln darauf verschriben hat, nach lautt ains briefs, dem erbern Jacoben Linfelder, der benanten Kathrein pruder, der noch nicht vogtper ist, und seinen erben. Von ersten umb¹ hundert pfunt phening, die demselben Jacoben zu aufschacz gesprochen sind von der Spéhenmül wegen, die der egnanten Kathrein seiner swester an der tailung gevallen ist. Und umb achtundnewnczig pfunt, drey schilling und aindlef phening, die demselben Jacoben zugebürnt von des kauffs wegen, des egnanten Schönpruker hauss wegen, in der Kernerstrass gelegen, die im auch zu seim tail gegen der vorgnanten seiner swester an der tailung gevallen sind, nach lautt der tailbrief darumb ausgangen. Die paid sumen pringent hundert achtundnewnczig

phunt, drey schilling und aindlef phening, die der egnant Schonpruker und sein erben ausrichten und beczaln sullen dem egnanten Jacoben Linfelder, wenn er vogtper wirt oder ob er ungevogter abging, darnach seinen nagsten erben, wenn sy die vordernt und nicht lenger peiten wellent, darnach ynner dem nagsten moneid an alles vercziehen, ut littera. Actum an Montag nach unsers Fraun tag der Kundung, anno etc. lio.

Summa xiii s. d.