Eintrag vom 1463-02-04Informationen zum Dokument

Andree Awer, mitburger ze Wienn hat versaczt die ubertewrung seins hawss mit seiner zugehorung, gelegen undern Satlern daselbs ze Wienn, zenagst Andreen Hofmaister des kürsner hawss an ainem tail, über die tausent phunt Wienner pfennig, darumb dasselb hauss vormalen zu hannden und nucz der armen lewt in der purger spital versaczt gewesen ist. Dem erbern Casparn Guttentag, taferner hie ze Wienn, Elspeten seiner hausfrawwen und irn erben umb hundert newnundachczigk pfunt und fünfczigk Wienner pfennig und sind zu beczalen auf die nachstkünftigen Ostern an alles vercziehen ungeverlich. Actum an Freytag nach unsern lieben Frawn tag der Liechtmess, anno etc. lxiiio.

Summa xii s. xviii d

Nota der sacz ist der obgemelten Elspeten, des Guttentag hausfrau von demselben irm man geschaft worden und darauf auf dem puch getan in vi ante Mathei apostoli et evangeliste, anno etc. lxvo 27, tenore testamenti Gutentag in libro civitatis … etc.

Item ob der benant Awer die obgenant geltschuld auf die benanten Ostarn nicht beczalt, so sullen die obgenanten kanlewt Caspar Gutentag und Elspet sein hausfrau darumb behabte und erlangte recht haben. Und in sol der Recht münssenmaister an alle clag und fürpit darumb ain erlangten gerichtsbrief also gevertigten geben. Das ist des obgenanten Andreen Awer guter will und wolgevallen.