Eintrag vom 1463-02-21
Anna, Jacoben des Tragkhen hausfrau und Agnes, Hannsen Ingelstetter hausfrau, baid Mathias des Alczer seligen töchter habend versaczt ir hawss, genant underm Nuspawm, gelegen in der Schulstrass am ekh, da man in das Kumpfgessl geet, da man jerlich dint dem brobst zu Sannd Steffan daselbs drew pfunt pfennig. der Irer mueml junckhfrawen Veronica, Wolfgangen Salczer, irs pruder seligen tochter und irn erben umb newnczigk pfunt Wienner Pfennig und sind zu beczalen, wan die obgenant junckfrau Veronica vogtper wirdet, an vercziehen. Actum an Montag vor Petri ad Kathedram, anno etc. lxiii.
Summa iii s d.
Nota die geltschuld ist dem Lewbenpekhen und junkhfrawen Agnesen, Hannsen Inglstetter tochter gesprochen nach laut der zuspruch, im statpuch hie geschriben. Und haben den sacz ledig gesaczt.
Zitierhinweis
Eintrag vom 1463-02-21, Nr. 00107, In: Ertl, Thomas/Andorfer, Peter/Fiska, Patrick/Weinbergmair, Richard/Grünwald, Korbinian: Ein Wiener Grundbuch des 15. Jahrhunderts. Digitale Edition des Satzbuch CD (1438-1473). (Mai 2021), https://grundbuecher.acdh.oeaw.ac.at/e00107_1463-02-21.html