Barbara, Stephans Gusner hausfraw hat versaczt ir hawss mit seiner zugehorung, mit dem vordern tail in der vordern Pekhenstrass und mit dem hindern in der hindern Pekhenstrass, zwischen Micheln von Pirpawm und Appolonien, Hannsen Hawgen hausfrawn héwser gelegen. Davon man jerlich dint dem capplan der mess, so Dorothe, Niclasen vom Tanwald seligen witib zu Sand Stephan hie gestifft und der ersam rate der stat zu Wienn zu frawen Elspethen der Redischerinn mess geaigent, sechs phunt phenig zu purkrecht, die abzelosen sind mit sechtzig phunt phenig nach lautt des purkrechtbriefs. Dem edelen vessten Symon Pötl zu Hebreichstorff und sein erben umb zwayhundert vier phunt und funffundachtzig Wienner phenig. Und sind zu beczalen, wann sy die ervordern und nicht lennger peiten wellen, darnach an alles verziehen ungeverlich. Actum an Freitag in den heiligen Weichnachtfeyrtagen, anno domini etc. lxximo.

Summa xiii s. x d.

Pötl habet cedulam.

Nota maister Paul Tag, chorherr zu Sand Steffan und diczmals ain ainiger geschefftherr des Pötlein hat den sacz ledig gesagt, auch von der sacz zedl wegen ainen tödt- und schermbrief zu dem puch erlegt. Actum feria sexta ante Johannis Baptiste, anno 99.