Eintrag vom 1470-01-26Informationen zum Dokument

Cristan Schönnperger hat versaczt sein haws, gelegen in der Munsserstrass zenagst Hannsen Haringseer kinder zuehaws, und stosset mit dem hindern tail in den Kamerhof. Dem erbern Hannsen Reyttinger, burger zu Wienn, seinem mitgeschefftman, frawn Dorothen, Petern Furbringer seligen witib gescheffts und seinen nachkomen volfurern desselben geschefts, zu stifftung der mess, so dieselb Dorothe ze stifften geschafft hat, nach lautt irs gescheffts, das im statpuch hie geschribeen stet. Umb hundert phunt Wienner phening, die der egenanten Dorothen haymstewr von irm erern mann, Niclasen Schön, weilent burger zu Wienn auf aim weingarten, am Nuserg im der Muttern Schoss gelegen, genant der gér, des gotzhaws zu Closternewnburg grunts, verschriben gewesen sein. Und alle diweil er und sein erben die vorgenant sumen phenig innhaben und nicht betzalln, so sullen sie alle jar davon raichen und dienn vir phunt der egenanten phening zu hannden der mess, zu den vir quatembern im jar, zu yeder quatemer ain phunt phenig. Und sullen mit dem ersten dinst anheben zu der quatemer in der vasten nagstkünftigen. Und ob si den egenanten dinst zu yeder zeit, als vor stet nicht ausrichteten und geben, so sullen sy mit dem egenanten hawss irm furphant, irn frumen schaffen, mit verkauffen oder versetzen, nach der statrechten zu Wienn, ut littera. Actum an Freitag nach sand Pauls tag Conversionis, anno etc. lxxmo.

Summa nulla propter officium …

Ex iussu magistri civium et consulatus.

Nota das hawss stet Sigismund Parnfues in der gwer, utz libro novo E, folio 163. Und hat daz purkrecht auf sich genommen, anno etc. lxxxvito.