Eintrag vom 1471-04-23Informationen zum Dokument

Elsbeth, der edeln Linharten Zwitter hawsfraw hat verkhaufft sechsundzwainczigk Ungrisch guldein, gerecht in gold und wag, und sibenundsibenczigk Wienner phenning jerlicher gült auf irm haws, gelegen an Sannd Peters freithof, mit seiner zugehorung, zenagst dem tumbbrobsthof, genannt des Stracher haws. Umb drewhundert und achczigk Ungrisch guldein, auch gerecht in gold und wag, die sy zu ablösung irer mül mit irer zugehorung, gelegen auf der Wienn, genannt die Verberinn, gebraucht hat, dem ersamen hochgelertten maister Harttungen von Kappell, lerer bauder rechten und seinen erben. Und alle dieweil man die obgenannten drewhundert und achzigk guldein hawbtguts nicht bezallt, so sol die vorbenanntt Elsbeth Zwitter inn und ir erben und nachkomen, so das bemeltt haws an Sannd Peters freithof mit seiner zugehorung innehaben und besiczen. Dem egenanten maister Harttung, seinen erben oder, wem er das schafft, macht oder gite, die egenante gult an abslag der vorbenanten hawbbsum jerlichen davon dienn und raihen zu den virr quattemmbern im jare, zu yeder quattember sechs guldein Ungrisch, gerecht in gold und wag, funff schilling und vierunwzainzigk phening, mit allen den nuczen und rechten, als man ann derselbn gullt und dienste in der stat zu Wienn raicht und gibt. Und sullen mit dem ersten dienst anheben zu der quattember zu Phingsten nagstkünftigen an alles verziehen, getrewlich und ungeverleich. Actum an Eritag vor sannd Jorigen tag, anno etc. lxximo.

Summa iii tl., vii s. d.

Meister Harting habet cedulam.