Eintrag vom 1455-12-22Informationen zum Dokument

Fridreich Arnolt der kursner hat gemacht seiner hausfraun Annen sibenczig pfunt pfening auf der uberteurung seins hauss, gelegen am Kienmarkt zenagst Hannsen Veial des fleischakcher haws im Winkchel. Uber die funfundachczig pfund pfening, die junkfraun Annen seiner tochter vor darauf verschriben sein, und uber die zehen pfund pfening gelts purkrechts, die hern Jorgen Schrot, verweser der messe, so Eberhart Kasstner zu Sand Peter gestifft hat, die abczulosen sind mit hundert pfunt pfeningen, nach lautt ains purkrechtbriefs nachmalen darauf verphendt sind. Also mit ausgenommen worten ist, das der egenant Fridreich mit dem tod abget ee dann die vorgenant Anna sein hausfrau, so sol sy dann die egenanten sibenczig pfund pfening auf der uberteurung des egenanten hauss leidclichen haben. Ging sy aber ab ee dann er, so sol er dieselben pfenig sein lebteg innhaben, nuczen und niessen unverchumert und nach seim tod sullen sy herwider erben auf der egenanten Annen seiner hausfraun nagst erben, darauf die dann zu recht erben und gevallen sullen, an allen krieg. Actum an Montag vor dem heiligen Weichnacht tag, anno etc. lvto.

Summa iiii s. xx d.

Nota die obgenanten sibenczig phunt phening sind erblich gevallen auf Agnesen, Micheln Takhel zu Closternewnburg hausfrau, nach lautt irer beweisten freuntschaft im statpuch hie geschriben. Und hat den sacz ledig gesagt in servicia heren Larenczen Haiden, Rauscher Schrott und · des Trauttnernrichter daselbs zu Closternewnburg.