Hanns Lanng und Hanns Gerestenner habent versaczt ir haws, gelegen in der Kérnerstrass zu Wienn, genant des Vaschanghaws, gegen Sand Johanns über, zenachst Niclasen des Pilgremen haus umb xx. Den erbern Niclasen Schönn und Niclasen Reich dem apoteker zu handen und als gerhaben Petreins des Sturm, Petern des Sturm und Elsbeten seiner hausfraun seligen sun. Umb xxxiiii tl. d., die von des egenanten Sturm zwain heusern bei der Hohenprugk gelegen, die die genanten gerhaben verchaufft habent, und uber die geltschuld, so darauf gewesen ist, uberbeliben sein. Und xvii tl. vii s. xxiiii d, die von den longold, den schenkchandeln und rupfen, so auch der egenant Stúrm hinder im gelassen hat, herkómen, und uber alle ausrichtigung seins geschéfftz über worden sein. Daz alles mit sumen pringt lii tl. vii s. xxiiii d., die sol¹ der genant Hanns Lang und sein erben mitsambt ainer weingarten am Kallnperg, in der ziegelgrub, des drew virtail ist, der auch dem egenanten knaben zugehört, innhaben, nüczen und niessen. Und wenn denn derselb knab zu land kumbt und das vorgenant gelt vodert, so sullen si im dann dasselb gelt beczaln und des genanten weingarts abtreten. Beschéch aber, daz derselb knab in rechten tégen nicht zu land kém oder das der genant Lang geweisen moht, daz er gevogter gestorben wér, so sullen dann die genant sumen pfening und der weingarten gevallen und geantwurt werden seinen nachsten erben, den dann dasselb gut rechter angehört. Wer aber, das die genanten gerhaben oder der obgenant Lang geweisen mohten, daz der vorgenant knab ungevogter abgegangen wér, so sullen dann der genant Lang und sein erben den vorgenanten gerhaben oder iren nachkomen darnach nach dem nachsten lesen, des genanten weingarts abtreten. Und in darczu der vorgenanten sumen pfening ausrichten und beczaln, die si dann mitsambt dem genanten weingarten durch gotz willen geben sullen, als das der genant Peter Sturm seliger geschafft hat und² nach laut ains geltbriefen, den die vorgenanten gerhaben darumb habent. Actum feria secunda post Udalrici anno etc. xxxviiio.

Summa iii s. x d.

Den sacz hat Peter Sturm ledig gesagt feria quarta post Invocavit ano etc. xlmo.